Traces

忍唔住手走左去魚街入多幾塊草皮，而家等佢慢慢生啦，D人話迷你矮珍珠好難種，希望種得掂。

見D火焰蝦，黃金米蝦同雪球米蝦落左缸一排都冇死傷，估計D水應該差唔多。又出左魚街100蚊3隻買左紅水晶蝦，40蚊6隻A級櫻花蝦返去挑戰下。點知返到樓下見到開左間魚店咪走入去睇下有咩買，入到去見間野hea到爆，個老細又唔係做生意咁款都諗住走架喇。多口問下有冇蝦買，點知個老細竟然指住一個奇怪既地方話有得買，原來就係佢個位隔離個缸…個缸仲要燈都冇枝，見到佢個位附近有幾隻狗守住諗住都係算啦應酬望兩眼走人，點知佢好熱情叫我埋去睇唔洗驚。咁我咪走過去睇下囉，D蝦又OK喎(其實可能係我都唔識分啦，又冇燈)，之後佢見我手持魚袋就問我係咪去完魚街買野叫我拎出黎分享下，咁我咪比佢睇100蚊3隻既紅水晶囉，點知話好驚訝咁大叫「我賣比你啦100蚊7隻」，起初都以為佢講笑咪問多次佢係咪真係賣，「唔係拎黎賣唔通我自己食咩」，咁我咪話要100蚊囉，最後佢求其撈左9隻比我…有賺! 之後應該都會去佢度買算。勝在夠平，除非之後想玩血統啦如果唔係都夠哂。

另外好耐之前買左袋火焰蝦，有3隻終於做左媽媽，好興奮，點知第二日就死左隻…

希望另外2隻順產啦!

而家個缸生物:

紅水晶蝦1x隻，雪球米蝦6隻，黃金米蝦4隻，火焰蝦X隻，櫻桃蝦X隻，櫻花蝦X隻。

綠燈5條，藍眼燈3條，一線小丑燈2條，黃金蜆4隻

草:

珍珠草，唔記得咩名紅草，迷你矮珍珠。

開缸五寶:

1. ADA Tour­ma­line BC (電磁粉)底床防腐劑

2. ADA Bac­ter 100 硝化細菌粉

3. ADA Clear Super 清水粉

4. ADA PenacP 幫助幼苗生長粉沫

5. ADA PenacW 防底床硬化粉沫

另加 ADA Power Sand Spe­cial 營養底床火山粒 “內含硝化細菌粉+清水粉

起初砌左幾個石景，最後都係覺得好樣衰由頭黎過。

之後又遇到ADA I代泥水黃現象，最後用活性碳吸左成個禮拜先唔再黃。